Конзорциум од осум одбранбени компании, предводен од Airbus, покренува нов проект за развој на борбен авион од шеста генерација, наречен „Team Gen 6“, со поддршка од Германија.
Иницијативата доаѓа откако пропадна француско-германско-шпанската програма Future Combat Air System (FCAS), која со години важеше за еден од најамбициозните европски одбранбени проекти.
Новиот конзорциум официјално треба да биде претставен во текот на неделава во Берлин, во рамки на воздухопловниот саем ILA. Покрај Airbus, во проектот учествуваат европскиот производител на ракети MBDA и шест германски компании: Hensoldt, Diehl Defence, MTU Aero Engines, Liebherr, Autoflug и Rohde & Schwarz.
Целта е развој на борбен авион од следната генерација под германско водство. Компаниите веќе му доставиле документ со својата визија на германскиот министер за одбрана Борис Писториус, барајќи германската влада навреме да го додели договорот, најдоцна до втората половина на 2026 година.
Писториус изјави дека проектот е „една од можните опции“, но посочи дека Берлин разгледува и алтернативи, меѓу кои набавка на дополнителни американски авиони F-35 или приклучување кон други програми за развој на борбени летала.
Програмата FCAS, започната во 2017 година, а на која Шпанија ѝ се приклучи во 2019 година, се сметаше за симбол на европската одбранбена соработка. Нејзиниот неуспех се оценува како сериозен удар за европските напори за зајакнување на воените капацитети во услови на растечки безбедносни закани од Русија.
