Европа нема да успее да го искорени вирусниот хепатитис како закана за јавното здравје до 2030 година, и покрај напредокот постигнат во последните години, предупредува Европскиот центар за превенција и контрола на болести (ЕЦДЦ).
Според ЕЦДЦ, главните причини се недоволната вакцинација на децата и недоволно развиените мерки за превенција во голем број европски земји.
„Никој не треба да умира од болест што може да се спречи, дијагностицира и лекува. Сепак, милиони Европејци живеат со хроничен хепатитис Б или Ц без да знаат дека се заразени, што може да доведе до сериозни последици, како што се откажување на црниот дроб или рак“, изјави Бруно Чијанчо од ЕЦДЦ.
Според проценките, околу пет милиони луѓе во Европа живеат со хроничен хепатитис Б или Ц, а секоја година околу 60.000 лица умираат од заболувања на црниот дроб поврзани со овие инфекции.
ЕЦДЦ наведува дека бројот на акутни инфекции со хепатитис Б постојано се намалува од 2006 година благодарение на програмите за вакцинација, а рутинското тестирање на бремените жени значително го намалило преносот на вирусот од мајка на дете.
Сепак, само мал број земји ја достигнале целта на Светската здравствена организација за вакцинација на најмалку 95 проценти од децата против хепатитис Б. Дополнително, мерките за спречување на ширењето на хепатитис Ц, како обезбедување стерилни игли и супституциска терапија за зависници, сè уште не се доволно достапни во повеќето држави.
Хепатитисот Б најчесто се пренесува преку заразена крв, телесни течности и сексуален контакт, додека хепатитисот Ц најчесто е поврзан со употреба на дроги преку инјектирање и сексуални односи меѓу мажи. ЕЦДЦ предупредува дека превентивните програми за спречување на сексуалниот пренос на вирусот не се следат систематски во сите европски земји.
