Иако календарски летото сè уште не започнало, голем дел од Европа во наредните денови ќе се соочи со првиот сериозен топлотен бран оваа сезона, предупредуваат метеоролозите.
Според прогнозите, над западна и централна Европа се формира силна „топлотна купола“ – област со висок воздушен притисок која ќе задржи екстремно топол воздух пристигнат од Сахара и ќе го спречи неговото мешање со посвежи воздушни маси.
Метеоролозите наведуваат дека овој временски феномен може да донесе температури и до 45 Целзиусови степени во делови од Португалија, Шпанија и Франција. Истовремено, жештините постепено ќе се шират кон северните и источните делови на континентот, вклучително и Балканот.
Дополнителен проблем претставува фактот што голем дел од европското тло веќе е значително исушено по невообичаено топлиот крај на мај. Поради тоа ќе биде намален природниот ефект на ладење преку испарување, што дополнително ќе придонесе за раст на температурите.
Според прогнозите, во одредени региони температурите би можеле да бидат и до 18 степени над просекот за крајот на јуни. Топлотниот бран ќе започне од северозападна Африка, а потоа ќе се прошири кон југозападна, западна и централна Европа.
Најпогодени ќе бидат Шпанија, Португалија и Франција. Во Франција, одредени метеоролошки модели предвидуваат температури меѓу 41 и 44 степени, додека во Париз и другите големи градови се очекуваат повеќедневни горештини со температури меѓу 35 и 40 степени.
Високите температури ќе ги зафатат и Германија, земјите од Бенелукс и Велика Британија, каде што се очекуваат вредности над 30 степени. Во Италија температурите ќе се движат меѓу 35 и 40 степени, а во долината на реката По локално може да бидат и повисоки.
Метеоролозите предупредуваат дека топлотниот бран би можел да потрае до крајот на јуни, зголемувајќи го ризикот од суши и шумски пожари. Балканот исто така ќе го почувствува неговото влијание, иако засега не се очекуваат екстремни температури како во западна Европа. Во поголемиот дел од регионот температурите би се движеле меѓу 30 и 35 степени.
