Европратеничката со македонско потекло Ирена Јовева годинава ќе ја добие наградата „Светилник“, признание што Белградскиот центар за безбедносна политика го доделува за исклучителна храброст и јавна одговорност.
„Светилник“ постои од 2023 година и се доделува на поединци кои преку своето делување се истакнале во заштита на демократијата и човековите права. Досегашни добитници се Александар Обрадовиќ и Катарина Петровиќ.
Јовева, родена во Словенија во 1989 година во семејство со македонски корени, ја започна кариерата како новинарка специјализирана за европски теми, а во Европскиот парламент влезе по изборите во 2019 година. Таму се профилираше како еден од гласните застапници за медиумски слободи, човекови права, младински политики и демократски стандарди во регионот.
Во образложението за наградата се наведува дека Јовева „постојано, јавно и без задршка реагира кога политичките слободи се загрозени“, и дека била меѓу ретките европски политичари кои силно ја поддржаа борбата на граѓаните и студентите во Србија за правда и демократски избори.
BCBP посочува дека нејзините јавни настапи, колумни и апели ја истакнале потребата Европската Унија да застане зад вредностите што ги проповеда, и дека човековите права не смеат да се третираат како локално, туку како универзално прашање.
Наградата ќе ѝ биде врачена на отворањето на Белградската безбедносна конференција, која се одржува од денеска до 19 ноември.
