Помалите европски аеродроми се соочуваат со сериозна закана од затворање поради наглиот раст на цените на авионското гориво, предизвикан од кризата на Блискиот Исток и блокадата на Ормутски теснец.
Според АЦИ Европа, регионалните аеродроми се најранливи и би можеле да се најдат пред „егзистенцијална закана“ доколку авиокомпаниите продолжат да ги намалуваат летовите и да ги зголемуваат цените.
Главниот извршен директор на организацијата, Оливие Јанковец, предупреди дека овие аеродроми сè уште не се опоравиле од пандемијата, со сообраќај што е околу 30 проценти под нивото од 2019 година.
„Сегашните цени на горивото и можната нова криза на трошоци за живот значат дека многу регионални аеродроми ќе бидат погодени и од намалена понуда и од намалена побарувачка. За нив тоа е рамно на егзистенцијална закана“, изјави Јанковец.
Кризата веќе се одразува во пракса. Луфтханза откажа околу 20.000 летови на својата регионална подружница, што е јасен сигнал за притисокот врз секторот.
Дополнителен товар може да донесе и новиот систем на Европската унија за влез и излез (EES), кој предвидува биометриска контрола за патници надвор од ЕУ, што би можело да создаде метежи и оперативни проблеми на аеродромите.
Од Меѓународна асоцијација за воздушен транспорт, сепак, велат дека побарувачката за летови засега останува стабилна, но предупредуваат дека евентуален недостиг на гориво најпрво ќе ја погоди Азија, а потоа Европа.
Во меѓувреме, авиокомпаниите бараат олеснување на правилата за таканаречените „слотови“, односно правото на користење одредени термини за полетување и слетување, за да можат полесно да ги откажуваат летовите без да ги изгубат тие права во иднина.
Главниот извршен директор на Виз Ер, Јожеф Варади, оцени дека кризата е „целосен хаос“, но не очекува недостиг на гориво, туку пазарот да се прилагоди преку повисоки цени.
Сепак, тој предупреди дека клучниот момент за авиокомпаниите ќе биде есента, кога компаниите со слаба ликвидност би можеле да се најдат под сериозен притисок и потенцијално да пропаднат.
Кризата во авијацијата сè повеќе се поврзува со глобалните геополитички тензии, што значи дека иднината на европските регионални аеродроми ќе зависи не само од економските, туку и од безбедносните случувања во светот.
