Бугарската пејачка Дара сподели необично искуство од своето патување во Атина, каде сосема случајно се сретнала со најдобриот српски тенисер Новак Ѓоковиќ.
Пејачката на социјалните мрежи објави видео на кое заедно со Ѓоковиќ и неговата ќерка Тара танцуваат на нејзиниот хит „Бангаранга“, песна со која годинава победи на Избор за песна на Евровизија 2026.
„Вчера сосема случајно го сретнав Новак додека вечерав – најнеочекуваната средба, но некако се чувствуваше како да било пишано да се случи“, напиша Дара покрај видеото.
Пејачката додаде и дека средбата ја доживеала како доказ дека светот е навистина мал и дека понекогаш судбината знае да приреди неочекувани моменти.
Дара годинава триумфираше на Евровизија со песната „Бангаранга“, освојувајќи вкупно 516 поени. По победата беше свечено пречекана на аеродромот во Софија, а песната брзо стана хит на социјалните мрежи, каде што многумина снимаат видеа и кореографии инспирирани од неа.
Меѓу нив се најде и Новак Ѓоковиќ, кој повторно привлече внимание со танцувачкото видео снимено во друштво на победничката на Евровизија и неговата ќерка Тара.
