Фалсификувал потврди дека дарувал крв за да добие платено отсуство, кривична за полициски службеник

Полициски службеник вработен во Министерството за внатрешни работи е осомничен дека фалсификувал две потврди за дарување крв за да искористи платено отсуство од работа. Против него е поднесена кривична пријава за фалсификување исправа, информираат од МВР.

— реклама —

Одделот за внатрешна контрола, криминалистички истраги и професионални стандарди при МВР поднел кривична пријава до Основното јавно обвинителство за гонење организиран криминал и корупција, односно до специјализираното одделение надлежно за кривични дела сторени од лица со полициски овластувања и припадници на затворската полиција.

— реклама —

Според пријавата, А.А., вработен во Одделот за заштита на определени личности и објекти при МВР, иако на 3 март и на 9 јули 2026 година не дарувал крв во Институтот за трансфузиона медицина при комплексот клиники „Мајка Тереза“, наводно изготвил и употребил две лажни потврди за дарување крв.

Врз основа на овие потврди, тој подготвил две барања за користење платено отсуство. Првото се однесувало на 3, 4 и 5 март, а второто на 9, 10 и 13 јули 2026 година. Според МВР, пријавениот ги искористил отсуствата.

— реклама —

Поради сомненијата за сторено кривично дело „фалсификување исправа“ од член 378 од Кривичниот законик, против полицискиот службеник е поднесена кривична пријава.

Одделот за внатрешна контрола најавува и поднесување предлог за поведување постапка за утврдување одговорност за кршење на работниот ред и дисциплина.