Фараж предупредува на заканата од Путин, но бара контрола врз британската помош за Украина

Лидерот на британската партија Реформ УК, Најџел Фараж, оцени дека рускиот претседател Владимир Путин претставува поголема закана од кога било досега, но истовремено побара построга контрола врз британската финансиска помош за Украина поради загриженоста за корупцијата во земјата.

— реклама —

Фараж изјави дека Украина е „една од најкорумпираните земји во светот“ и изрази сомнеж за тоа како се трошат парите на британските даночни обврзници наменети за помош на Киев.

„Никогаш не сум рекол дека не треба да ја поддржуваме Украина. Но, сакам внимателно да провериме дали парите на британските даночни обврзници завршуваат во корупција“, изјави тој на прес-конференција, пренесува британскиот „Телеграф“.

— реклама —

Тој се повика на обвинувањата за корупција што ја потресоа администрацијата на украинскиот претседател Володимир Зеленски и оцени дека во одреден момент може да биде важно да се одржат избори во Украина.

— реклама —

И покрај критиките за трошењето на помошта, Фараж нагласи дека нема дилема оти Путин сега претставува поголема закана отколку во кој било претходен период.

Осврнувајќи се на договорот на американскиот претседател Доналд Трамп со Русија за купување 300.000 тони дизел-гориво, Фараж рече дека не го поддржува тој аранжман. Истовремено, ја критикуваше Европската Унија поради големите количества руски гас што, според него, европските земји ги купувале по почетокот на руската инвазија врз Украина во 2022 година.

— реклама —

„Кој купуваше огромни количества руски гас? Кој во поголемиот дел од изминатите пет години помогна во финансирањето на војната во Украина? Германија и други земји од Европската Унија. За тоа никогаш не се зборува“, изјави Фараж.