Претседателот на СДСМ, Венко Филипче, од собраниската говорница на седницата за пратенички прашања упати серија критики кон премиерот Христијан Мицкоски, оценувајќи дека Владата не успеала да ги реализира ветувањата дадени пред граѓаните во изминатите две години.
Според Филипче, пред доаѓањето на власт, ВМРО-ДПМНЕ ветувала подобар животен стандард, економски раст, ниска инфлација, повисоки плати, нови инвестиции, поддршка за земјоделците, реформи и европски напредок, но, како што рече, реалноста денес е сосема поинаква.
„Кога баравте власт и кога граѓаните ги молевте да ви дадат доверба, ветувавте сè и сешто. Ветувавте повисок животен стандард, економско заживување, ниска инфлација, раст на платите над растот на цените, повеќе странски инвестиции, помал буџетски дефицит, умерено задолжување, поддршка на земјоделците, иднина за младите, правда, реформи и европски напредок“, рече Филипче.
Тој потсети дека истите ветувања биле содржани и во програмата „1198“, но оцени дека граѓаните не ги почувствувале најавените промени.
„И во вашата програма 1198, и во вашето експозе, кога ја формиравте Владата, ветувавте мед и млеко. Денес, по половина мандат, вистината е сурова. Ниту едно од овие ветувања не е исполнето. Граѓаните не добија подобар живот, повисок стандард, функционални институции, правда и европска иднина“, истакна Филипче.
Лидерот на СДСМ оцени дека наместо најавениот напредок, граѓаните се соочуваат со повисоки трошоци за живот, партизација и економска неизвесност.
„Што добија граѓаните? Поскап живот, празни паричници, празни фрижидери, презадолжена држава, партизирани институции, тендери, лаги и изолација. Ни 10 проценти од ветеното во програмата не е исполнето. Само лаги, изолација и партиски тендери“, рече Филипче.
Во завршницата, тој порача дека резултатот од двегодишното владеење може да се сведе на една бројка.
„Една голема нула. Нула за реформи, нула за зголемување на платите, нула за мерки за младите, нула за поддршка на земјоделците и нула за европскиот пат. Кој е виновен за овие две изгубени години? Ќе излезете ли пред граѓаните и ќе признаете дека потфрливте и дека не ги исполнивте ветувањата?“, порача претседателот на СДСМ, Венко Филипче.
