Претседателот на СДСМ, Венко Филипче, во обраќање до младите порача дека токму тие се носители на промените и ги повика да останат во земјата и да се борат за подобра иднина.
„Вие сте оние кои секој ден размислувате дали да останете во својата земја или да заминете. Не сме тука за да чекаме подобри времиња, туку за да ги создадеме“, истакна Филипче.
Тој оцени дека државата не смее да биде управувана од, како што рече, „организирана криминална група“, додавајќи дека целта е институциите повторно да им служат на граѓаните.
Филипче нагласи дека СДСМ отсекогаш носел државнички одлуки и дека денес, покрај партијата, носители на промените се и експерти, граѓански иницијативи и невладини организации обединети во, како што рече, „Фронтот за вистина и правда“.
„Фронтот не е само политички проект. Тоа е борба на сите кои сакаат Македонија да биде слободна, праведна и дел од Европа“, рече Филипче.
Во обраќањето тој порача дека на државата не ѝ е потребен култ на лидер, туку функционален систем, демократска и правна држава и европска иднина.
„Вие не сте само иднината, вие сте сегашноста. Останете. Борете се. Верувајте. Македонија може подобро и ќе биде подобра. Јас сум со вас. До победа“, порача Филипче.
