Лидерот на СДСМ, Венко Филипче, одговарајќи на обвинувањата што доаѓаат од ВМРО-ДПМНЕ, порача дека владејачката партија премногу внимание посветува на опозицијата наместо на работата на Владата.
„Не знам зошто се занимаваат со нас? Нека ја гледаат Владата, како ја водат државата. Од една страна кажуваат дека сме партија пред изумирање, ќе нѐ победеле на избори. А од друга страна секој ден се занимаваат со нас“, рече Филипче.
Тој оцени дека ваквиот однос покажува оти власта е свесна дека СДСМ се консолидира и го зајакнува својот политички капацитет.
„Значи знаат дека партијата е консолидирана, дека нашиот капацитет расте, дека имаме добри кадри од кои сум многу задоволен. Секојдневно се работи, се приклучуваат и други луѓе – интелектуалци и млади“, додаде лидерот на СДСМ.
Според Филипче, граѓаните сѐ повеќе препознаваат дека неговата партија нуди перспектива за развој на државата.
„Луѓето сфаќаат дека само ние сме опцијата за напредок на државата“, изјави тој.
