Претседателот на СДСМ, Венко Филипче, на денешната прес-конференција го промовираше „Фронтот за вистина и правда“ и најави формирање на Национална антикорупциска дирекција НАД, по примерот на романското ДНА, како дел од новиот Закон за нулта толеранција за корупција.
„Денес го објавувам фронтот за истина и правда кој го сочинуваат опозициски партии, граѓански организации, невладини организации, видни интелектуалци, поединци, независни активисти, млади, сите обединети околу вредностите за Европска Македонија“, истакна Филипче.
Тој нагласи дека првиот закон што ќе го потпише новата влада и тој како премиер ќе биде Закон за нулта толеранција на корупција и целосна дигитална транспарентност.
„Ќе се осврнам на клучниот стол на кој програмата се темели, а тоа е Закон за нулта толеранција на корупција и целосна дигитална транспарентност. И тоа е првиот закон кој што како премиер на новата влада после изборите ќе го потпишам во интерес на сите граѓани и во интерес на иднината на земјата“, рече Филипче.
Во рамки на законот, Филипче најави формирање на нова независна институција за борба против високата корупција.
„Второ, основање на национална антикорупциска дирекција НАД според моделот на романскиот ДНА. Нова целосно независна институција, полна финансиска и кадровска независност, надлежност за сите, од премиер до градоначалник до најситен функционер на локално ниво. Директорот се избира со двотретинско мнозинство во Собранието, за да не може ниту една политичка партија да влијае и да го контролира“, истакна Филипче.
Тој додаде дека новата дирекција ќе има сопствен буџет и истражители, по примерот на успешните европски модели.
„Ќе има сопствен буџет и сопствени истражители. Моделот е комбинација на романското ДНА, која има огромна ефикасност, и естонските дигитални алатки. Финансирањето 60% од европските пристапни фондови и 40% од буџетот, плус пари вратени од корупцијата“, рече Филипче.
Филипче најави и целосна соработка со Европското јавно обвинителство.
„Ќе имаме директна размена на информации, заеднички истражни тимови и техничка поддршка од Европа. Ова значи дека високата корупција, министри, пратеници, големи тендери со огромни суми на народни пари, ќе можат да ги истражуваат и европските обвинители“, порача Филипче.
„Ова не е само закон, ова е гаранција дека корупцијата ќе има име и презиме и датум на суд. Секој кој го прекршил законот ќе одговара“, нагласи претседателот на СДСМ.
