Лидерот на СДСМ, Венко Филипче, од изборниот конгрес на НСДП упати повик до политичките партии, граѓанските организации, активистите, интелектуалците, младите и пензионерите да се приклучат кон Фронтот за слобода и правда, иницијатива која, како што рече, има цел да се спротивстави на актуелната власт.
Филипче му честиташе на претседателот на НСДП, Горан Мисовски, за досегашната работа и се заблагодари за долгогодишната коалициска поддршка, оценувајќи дека двете партии делат исти вредносни политики.
„Коалицијата и соработката продолжуваат и понатаму, сега и во една нова форма во Фронтот за слобода и правда. Во Фронтот ги повикуваме и сите други политички партии, не само овие кои веќе го потврдија учеството, туку и други политички партии, па дури и дел од коалициските партнери на сегашната власт“, изјави Филипче.
Тој упати повик и до граѓанските организации, активистите, студентите, младите и пензионерите, оценувајќи дека во земјата нема перспектива со актуелната власт.
Во своето обраќање, Филипче ја обвини Владата за криминал, економски штети и меѓународна изолација на државата, тврдејќи дека работи спротивно на интересите на граѓаните.
„Затоа заеднички во Фронтот да се бориме против оваа криминална власт која го пљачка и последниот денар од буџетот, која ја држи земјата во изолација и работи за туѓи интереси“, рече тој.
Според Филипче, Македонија повторно ќе се врати на европскиот пат и ќе стане демократска и слободна држава во која младите ќе ја гледаат својата иднина.
