Филипче: Изнуденото извинување не го брише срамот на Мицкоски, тоа ли е премиер, професор, пример за младите?

Претседателот на СДСМ, Венко Филипче, на денешната прес-конференција оцени дека извинувањето на премиерот Христијан Мицкоски по вчерашните случувања во Собранието било изнудено и не ги поништува, како што рече, навредите упатени кон опозицијата.

— реклама —

Според Филипче, вистинското извинување подразбира признавање на грешката, промена на однесувањето и преземање одговорност, а не, како што оцени, формален обид за спас на политичкиот углед.

„Ќе беше културно и достоинствено ако се извинеше, но тој само создаде привид. Се извини во празна сала, откако опозициските пратеници веќе ја напуштија. Тоа беше политички театар. Едно срамежливо, изнудено „извинете“, кое не може да ги избрише навредите и начинот на кој се однесуваше“, изјави Филипче.

— реклама —

Тој смета дека ваквото однесување не е срам само за функцијата премиер, туку и за институциите што ги претставува, додавајќи дека испраќа лоша порака до младите, студентите и до меѓународната јавност.

— реклама —

„Ова е срам за функцијата што ја извршува, за универзитетите, за Собранието, за Владата и за државата. Каква порака им испраќа на младите и на студентите? Вакво однесување од претседател на Влада досега не е видено, ниту кај нас, ниту каде било во Европа“, рече Филипче.

Тој додаде дека, според него, нервозата на Мицкоски е последица на падот на довербата кај граѓаните и на неисполнетите ветувања.

„Спуштањето на политичката комуникација на ова ниво не може да се оправда со ништо, најмалку со нервозата што произлегува од падот на довербата кај граѓаните и од неговиот личен рејтинг, кој самиот го урна со секојдневните лаги и неисполнетите ветувања“, изјави Филипче.