Претседателот на СДСМ, Венко Филипче, преку објава на социјалната мрежа X оцени дека претседателката Гордана Сиљановска-Давкова за првпат јавно изнела ставови кои, според него, СДСМ и граѓанскиот „Фронт за вистина и правда“ ги застапуваат подолг период.
Филипче се осврна на изјавата на Сиљановска-Давкова дека Македонија треба да се европеизира преку реформи и владеење на правото, а не преку историски и идентитетски дебати, нагласувајќи дека историските спорови со Бугарија не се дел од европските услови за продолжување на преговорите.
„По прв пат некој од ВМРО јавно го кажува она што ние во СДСМ, а сега и во големиот граѓански фронт, го повторуваме веќе долго време. Историските спорови со Бугарија и работата на Историската комисија не се дел од условите за продолжување на преговорите со Европската Унија. Тоа е билатерално прашање меѓу Македонија и Бугарија, а не европски услов“, напиша Филипче.
Тој посочи дека реформите и исполнувањето на Копенхашките критериуми се клучни за напредокот на државата кон Европската Унија и дека тие не претставуваат закана за македонскиот јазик, култура и национален идентитет.
„Упорно објаснуваме дека реформите и Копенхашките критериуми се европски барања, а не бугарско прашање и дека се клучни за продолжување на преговорите“, наведува Филипче.
Во објавата тој упати критики и кон премиерот Христијан Мицкоски, обвинувајќи го дека преку, како што наведува, „лаги и пропаганда“ го дели народот и ја изолира државата.
„Не смееме да дозволиме Мицкоски со лаги и пропаганда да го дели народот, да ја изолира Македонија поради својот криминал и корупција и да ја остави Македонија како слепо црево на Балканот“, пишува лидерот на СДСМ.
На крајот од објавата, Филипче ѝ се обрати директно на претседателката.
„Гордана, ви благодарам за вистината. Како професорка по право, се надевам дека наскоро ќе бидете и на страната на правдата. Реформи сега. Европа сега“, порача Филипче.
