Филипче: Карпалак не смее да биде само датум во календарот

Претседателот на СДСМ, Венко Филипче, оддаде почит на загинатите бранители кај Карпалак, по повод 25-годишнината од нивната смрт, порачувајќи дека нивната жртва не смее да биде заборавена и дека мирот и стабилноста се градат со одговорност, а не со поделби.

— реклама —

Во објава по повод годишнината, Филипче истакна дека на 8 август се оддава почит на младите луѓе кои ги положиле своите животи исполнувајќи ја должноста кон татковината.

— реклама —

„Денес, на 8 Август, се сеќаваме и оддаваме почит на загинатите бранители кај Карпалак. Пред 25 години овие млади луѓе ги положија своите животи исполнувајќи ја должноста кон татковината. Нивната жртва останува дел од нашата колективна меморија и обврска“, порача Филипче.

Тој додаде дека Карпалак не смее да остане само датум во календарот, туку траен потсетник за значењето на мирот и заедништвото.

— реклама —

„Се сеќаваме со почит. Им се поклонуваме со достоинство. Карпалак не смее да биде само датум во календарот. Карпалак е потсетник дека мирот и стабилноста се бранат со одговорност, а не со поделби. Иднината на Македонија се гради заеднички, без страв и без омраза. Вечна им слава. Почит кон нивните семејства“, наведува претседателот на СДСМ.

На 8 август 2001 година, кај месноста Карпалак, во напад врз армиски конвој загинаа десет припадници на Армијата на Република Македонија, настан кој останува еден од најтрагичните моменти од конфликтот во 2001 година.