Претседателот на СДСМ, Венко Филипче, на денешната прес-конференција порача дека партијата ќе ги искористи сите демократски механизми за да не дојде до укинување на техничката влада, оценувајќи дека таа мора да продолжи да постои како гаранција за фер изборен процес.
Филипче истакна дека, според СДСМ, постојниот систем на владеење претставува, како што рече, „имитација на моделот пред 2016 година“, кога институциите биле под политичка контрола.
„Ако целиот механизам на владеење е имитација на системот од времето на Никола Груевски, кога институциите беа узурпирани од партија и блиски луѓе, денес гледаме ист модел. Судството е под притисок кој не е виден во ниту една европска држава“, рече Филипче.
Тој додаде дека загрижува и состојбата во Министерството за внатрешни работи, кое, според него, се соочува со депрофесионализација и партизација поради нови законски решенија и систематизации.
„Со новиот Закон за полиција се укинува кариерниот напредок и се остава простор за дискреционо назначување, што ќе доведе до целосна партизација на МВР“, изјави Филипче.
Филипче посочи и на ризиците поврзани со системот „Сејф сити“, наведувајќи дека не постојат доволни заштитни механизми за чување и користење на податоците, што отвора прашања за можна злоупотреба.
Во обраќањето тој го спомена и изборот на нов директор на МТВ, оценувајќи дека тоа е уште еден аргумент за потребата од задржување на техничката влада и за заштита на независноста на институциите.
„Националниот сервис треба да биде независна институција, а не под влијание на политички структури и блиски луѓе до премиерот“, рече Филипче.
