Претседателот на СДСМ, Венко Филипче, оцени дека институциите задоцниле со реакцијата по загадувањето на водата во Гостивар и побара одговори за безбедноста на таканаречената техничка вода.
На денешен брифинг, Филипче изјави дека препораките на Министерството за здравство за рано откривање на симптомите на жолтица доаѓаат предоцна, кога, според него, епидемијата веќе земала сериозен замав.
„Водата во Гостивар е показател дека сите реакции задоцнија. Дури денес Министерството за здравство носи препораки за рано откривање на симптомите на жолтица, кога епидемијата веќе има силен замав“, рече Филипче.
Тој посебно ја доведе во прашање препораката за користење техничка вода, поставувајќи прашања за нејзиното потекло, начинот на дистрибуција и контролата на нејзиниот квалитет.
„Кој ја контролира техничката вода? Од каде доаѓа? Како се користи во угостителските објекти и кој гарантира дека е безбедна?“, праша Филипче.
Според него, јавноста добива контрадикторни информации од институциите, поради што, како што рече, граѓаните не знаат кому да му веруваат.
Филипче се осврна и на состојбата со водоснабдувањето во Скопје, наведувајќи дека јавноста треба да биде информирана дали се проверени бунарите што го дополнуваат изворот Рашче, по појавата на загадување во реките Лепенец и Вардар.
Тој оцени дека целиот случај претставува пример за „максимално несериозна импровизација и задоцнета реакција“ од надлежните институции.
