Претседателот на СДСМ, Венко Филипче, на прес-конференција изјави дека премиерот Христијан Мицкоски ретерира од предлог-законот за двојни државјанства, бидејќи, како што тврди, повеќе функционери од ВМРО-ДПМНЕ поседуваат бугарски пасоши.
Според Филипче, повлекувањето на власта од ова законско решение доаѓа откако СДСМ предложила амандмани со кои ограничувањата би важеле и за актуелниот пратенички состав, како и предлог членовите на Владата да немаат двојни државјанства. Тој оцени дека со тоа била „разобличена вистинската намера“ на власта.
„Вистината е дека ги пресретнавме и разобличивме уште една нивна лага. Кога најавивме дека законот ќе важи и за актуелните функционери, тие почнаа да ретерираат“, рече Филипче.
Тој исто така посочи дека власта дополнително најавила консултации со правни експерти, прашувајќи зошто такви мислења не биле побарани пред поднесувањето на законот во Собранието.
Филипче оцени дека, според него, концептот на патриотизам што го застапува власта е „лажен“ и дека, како што рече, секојдневно се разоткрива во јавноста.
