Социјалдемократијата не е изборен украс ниту збор што добро звучи во кампања, туку идеја која постои за да ги заштити послабите, да обезбеди еднакви шанси и да создаде држава во која трудот е поважен од привилегиите, порача претседателот на СДСМ, Венко Филипче, на партискиот конгрес.
Филипче оцени дека конгресот претставува повеќе од формален партиски собир и е потврда дека партијата е подготвена да носи одлуки кои ќе ја обликуваат иднината.
„Овој конгрес е доказ дека сме цврсти, обединети и подготвени да ги носиме одлуките што ќе ја обликуваат нашата иднина. Целта не е само усвојување на нова идеолошка платформа, туку потврда дека СДСМ цврсто стои зад суштината на социјалдемократијата – правда наместо привилегија, солидарност наместо страв, фер оданочување наместо товар врз трудот, силни институции наместо партиска држава и европска иднина наместо националистичка магла“, рече Филипче.
Тој посочи дека моментот е историски и дека процесот на проширување на Европската Унија повторно добива политички импулс.
„На самитот ‘Европска Унија – Западен Балкан’ во Тиват беше потврдено дека овој дел од Европа е составен дел од иднината на Европската Унија. Проширувањето повторно добива политички момент. На дофат се конкретни придобивки за граѓаните“, истакна лидерот на СДСМ.
Според него, конгресот е поврзан и со иницијативите за обединување на прогресивните сили против национализмот, популизмот, авторитарноста и корупцијата.
Филипче нагласи дека социјалдемократијата значи заштита на работниците, достоинствени пензии, квалитетно образование и можност младите да ја гледаат својата иднина во Македонија.
„Вистинската социјалдемократска мерка не е повикување на платата, по правото на лекување, квалитетот на училиштето, по достоинството на пензионерите, по сигурноста на работникот и по шансата на младиот човек да остане дома и да живее од својот труд“, рече Филипче.
Тој порача дека пред СДСМ е задача да ја редефинира својата програмска основа и да ја прилагоди на новите политички и општествени предизвици, со цел партијата повторно да биде препознаена како носител на прогресивните политики во државата.
