„Најголемите предавници се Христијан Мицкоски и неговата криминална банда.“ рече претседателот на СДСМ, Венко Филипче, на денешната прес-конференција.
„Она на што игра ВМРО е приказна на предавници и странски платеници. Иста реторика од деведесеттите години во минатиот век, која донесе единствено до конфликт и изолација. Е, тоа е тоа што тие го сакаат. Народот да гладува, а тие да носат часовници од 60 илјади евра, да купуваат нов авион додека некој нема за леб. Банда обична. Собир на криминалци кои ве лажат“, обвини Филипче.
Филипче посочи дека европската интеграција претставува клучен државен интерес.
„Европа е нашиот национален интерес. Македонија треба да биде во Европа. Македонија и Европа се нашиот идентитет. Анти-европската кампања, евроскептицизмот, тоа се задачите на овој медиумски октопод од Будимпешта преку Белград до Скопје. Пласирање на лаги, збунување на гласачите, правење сателитски партии, некакви платформи, поделба на опозицијата“, потенцираше претседателот на СДСМ.
Филипче се осврна на медиумското влијание и пропагандата во јавниот простор.
„Драган Павловиќ-Латас, главен уредник на сето тоа што се пласира. Човек кои со години наназад работи за странски служби, кој учествуваше во палење на Американската амбасада, тука во Скопје заедно со УДБА. Тој е првиот соработник на Христијан Мицкоски. И тие живеат во луксуз, додека неговото семејство има бугарски пасоши. Тие двајца продаваат патриотизам на граѓаните. Тие обвинуваат некој за предавство“, обвини Филипче.
