„Филипче нема право да глуми борец за јавното здравје, тој бил директно вклучен во труењето на граѓаните со години“, вели Манасиевски

На денешната прес-конференција, портпаролот на партијата, Наум Манасиевски обвини дека поранешниот министер за здравство Венко Филипче не може да се претставува како заштитник на јавното здравје, тврдејќи дека во периодот кога раководел со Министерството за здравство институциите доставувале извештаи за неисправна вода, без јавноста да биде навремено информирана.

— реклама —

Манасиевски изјави дека до Министерството за здравство пристигнувале анализи кои покажувале небезбедна вода во повеќе општини, меѓу кои Студеничани, Зелениково, Петровец, Крушево и на одредени локации во Скопје.

— реклама —

Според него, во дел од анализите било утврдено присуство на бактеријата Ешерихија коли и зголемен број колиформни бактерии, а јавноста, како што тврди, не била известена за овие наоди.

Манасиевски рече дека располагаат со документи од центрите за јавно здравје од 2018, 2019 и 2021 година, за кои тврди дека биле доставени до Министерството за здравство во периодот кога Филипче бил министер.

— реклама —

Од ВМРО-ДПМНЕ побараа Филипче да одговори зошто, според нив, не постапувал по извештаите за неисправна вода и повикаа надлежните институции да го расчистат случајот и да утврдат дали имало пропусти и евентуална одговорност.

Партијата оцени дека граѓаните заслужуваат целосно да бидат информирани за сите околности поврзани со безбедноста на водата за пиење.