Претседателот на СДСМ, Венко Филипче, на денешната прес-конференција изјави дека, откако ВМРО е на власт, клучни сектори во државата биле ставени под влијание на кругот поврзан со Виктор Орбан, оценувајќи дека станува збор за политичко и економско користење на државата.
„Од кога Мицкоски и ВМРО се на власт, Орбан ја користеше Македонија како своја приватна колонија за политички и финансиски интереси“, рече Филипче.
Тој посочи дека телекомуникациите, енергетиката, медиумите и финансиите биле поврзани со истиот круг на влијание.
Во делот на медиумите, Филипче наведе дека значителен дел од медиумскиот простор е под контрола на структури поврзани со Орбан.
„Скоро 40% од медиумите, според истражувања на европски истражувачки новинари, се под директна контрола на луѓе блиски до Орбан. Преку бизнисмени како Петер Шац и Агнеш Адамик се контролираат медиуми кои се во служба на ВМРО и Мицкоски“, рече Филипче, додавајќи дека тие се користат за ширење лажни вести и анти-европски наратив.
Во делот на телекомуникациите, тој истакна дека преку доделување лиценци е овозможено дополнително влијание.
„Орбановата компанија 4iG доби лиценца за мобилен оператор во Македонија. Со тоа влегоа во 5G мрежата и добија можност да ги поврзат медиумите, платформите и инфраструктурата во единствен систем на контрола“, рече Филипче.
Тој додаде дека влијание постоело и во енергетиката и инфраструктурата, преку, како што наведе, тајни договори и посредници, меѓу кои и фирмата „Статус Енерџи“, поврзана со унгарската Status Energy KFT и поширокиот инвестиционен фонд OPUS Global.
Во однос на финансиите, Филипче изјави дека владата на Мицкоски добила кредит од една милијарда евра, кој го поврза со поширок пакет на влијание.
„Една милијарда евра, кинески пари, под таканаречени пријателски услови, кои ќе ги отплаќаат идните генерации. Тоа доаѓа како дел од пакет за политичка и медиумска поддршка“, рече Филипче.
Тој порача дека СДСМ ќе продолжи да бара одговорност и целосно расветлување на сите, како што рече, поврзани деловни и политички релации.
