Претседателот на СДСМ, Венко Филипче, на денешната прес-конференција изјави дека победата на демократијата во Унгарија претставува почеток на крајот на автократските режими во регионот и најава за нов политички период.
„Граѓаните на Унгарија јасно и гласно рекоа: ДОСТА Е од автократијата! Ова е голема, историска победа на демократијата над автократијата, на Европа над руското и кинеското влијание и на владеењето на правото над корупцијата“, истакна Филипче.
Тој додаде дека оваа победа испраќа јасна порака и за регионот.
„Историската победа во Унгарија испраќа јасна порака до целиот регион: времето на автократите завршува. Паѓаат автократските режими. Следен е Александар Вучиќ, а со него и Христијан Мицкоски. Регионот припаѓа на Европа, а не на Русија. Доаѓа време на правда и одговорност“, рече Филипче.
Филипче оцени дека падот на режимот на Виктор Орбан има пошироки политички последици за регионот, поврзани со, како што рече, бизнис и политички релации.
„Владата на Мицкоски ги стави стратешките интереси на Македонија во рацете на Орбан – не за државата, туку за свои лични и бизнис интереси. Телекомуникациите, енергетиката, медиумите – сè беше поврзано со кругот на Орбан“, изјави тој.
Тој додаде дека со политичките промени во Унгарија ќе се отвораат и прашања за сите досегашни договори и врски.
„Со падот на Орбановиот режим во Унгарија, наскоро може да дојде до целосно откривање на сите тајни бизнис комбинации меѓу Орбан и Мицкоски. Сега, сите овие договори ќе излезат на виделина. СДСМ ќе бара целосна истрага за сите бизнис комбинации меѓу Орбан и Мицкоски“, рече Филипче, додавајќи дека доаѓа време за вистина, правда и одговорност.
