Претседателот на СДСМ, Венко Филипче, на прес-конференција изјави дека, како што рече, „лажниот патриотизам“ на премиерот Христијан Мицкоски сè повеќе се разобличува во јавноста.
Филипче упати прашање до власта зошто најавува консултации со правни експерти за законот за двојни државјанства дури по неговото поднесување во Собранието, наместо тоа да биде направено претходно.
„Зошто не побарале мислење од правни експерти пред пратениците на ВМРО-ДПМНЕ да го поднесат законот?“, праша тој.
Според него, ретерирањето на власта во однос на уставноста на предлог-законот е резултат на амандманите на СДСМ, со кои било предложено решението да важи и за актуелните функционери, како и за членовите на Владата.
Филипче оцени дека со овие потези се открива вистинската намера на власта и додаде дека прашањето за двојните државјанства отвора дилеми за тоа во чиј интерес дејствуваат избраните функционери.
Во обраќањето, тој упати и остри критики до владејачката партија ВМРО-ДПМНЕ и нејзиниот коалициски партнер ЗНАМ, оценувајќи дека нивната политика, според него, не ги исполнува ветувањата дадени пред граѓаните.
