За новото задолжување владата побарала 300 милиони евра, а добила само 260 - банките веќе не ѝ веруваат, нагласи претседателот на СДСМ, д-р Венко Филипче, на денешната прес-конференција. Филипче посочи дека предлог законот за задолжување се носи нетранспарентно по скратена постапка и не се остава простор за дискусија.
„Втората, многу важна работа е што за прв пат, државата не добива толку пари колку што побарала од банките. Побарале 300 милиони евра, а добиле само 260 милиони евра. Исто така, страшно голема каматна стапка, многу блиска на домашните наши банки, 4,57%, и пари кои што не ги обезбедува една финансиска институција, толку конзорциум, групација на повеќе финансиски институции“, рече Филипче.
Тој додаде дека ова е најголем индикатор, дека кредитниот рејтинг на државата е нарушен.
„Нема поголем индикатор дека кредитниот рејтинг на земјава е нарушен и дека и банките повеќе не веруваат на оваа држава. Да не се добијат пари колку што државата побарала, побарале 300, а добиле 260 милиони евра, со висока каматна стапка и не од една, од повеќе финансиски институции, тоа до сега и на тој начин не се има случено. Сето тоа укажува дека оваа власт катастрофално ја води државата и ни претстои финансиски крах“, рече Филипче.
На прес-конференцијата Филипче укажа дека власта ги користи сите механизми за да испумпува народни пари за своите криминални тендери, додека државата ја турка во должничко ропоство.
„Вкупните долгови од 2024 година до сега се зголемени за нови 2 милијарди евра.
Од 8,4 милијарди евра колку што беше адолжувањето на земјата, долгот расте на 11 милијарди евра, тука влегува и криминалниот заем на кинески пари преку Унгарија од 1 милиарда евра. Се користат сите механизми за да се испумпуваат пари од буџетот кон партиските фирми на ВМРО, криминалната група, и ништо друго не е суштина на овој тип на задолжување во изминатите две години“, рече Филипче.
