Претседателот на СДСМ, Венко Филипче, на денешната прес-конференција во Собранието изјави дека укинувањето на техничката влада претставува автократски манир и дека СДСМ нема да го прифати ваквиот предлог.
Тој нагласи дека техничката влада не треба и не може да биде укината, бидејќи претставува единствен гарант за спроведување фер и демократски избори. Според него, во услови кога власта има целосна контрола врз судството и кога постојат дилеми околу користењето на податоците од системот „Сејф Сити“, укинувањето не е прифатливо.
„Вакви автократски манири не се дозволени и нема да прифатиме. Да потсетам, тој закон беше донесен за изборите во 2016 година, но на барање на Христијан Мицковски беше вратен во 2018 година и така важеше и за парламентарните избори во 2020 година“, рече Филипче.
Тој додаде дека ваквиот пристап на власта е сличен на начинот на владеење во периодот на Никола Груевски од 2006 до 2016 година. Филипче најави дека доколку предлог-законот продолжи со собраниска процедура, пратеничката група на СДСМ ќе се повлече од работната група за изборниот закон.
„Власта мора да го повлече овој закон. Пржинската влада, како единствен гарант за фер и демократски избори, мора да остане. Доколку законот помине во Комисија и процедурата продолжи, ние ќе се повлечеме од работната група“, изјави Филипче.
