Претседателот на СДСМ, д-р Венко Филипче, изјави дека последните анкети укажуваат на значителен пад на поддршката за ВМРО-ДПМНЕ, додека, како што рече, СДСМ бележи раст.
Одговарајќи на новинарско прашање, Филипче оцени дека граѓаните веќе ги препознаваат политиките на власта и се разочарани од нив.
„Нема да дозволам луѓе да ја делат СДСМ, затоа што имаме работа со криминална и корумпирана власт која не може да го спречи падот на анкетите. Ваков пад на ВМРО-ДПМНЕ досега немало, а ние имаме раст. Единственото што можат да го прават е да се обидуваат да ја делат партијата одвнатре за да продолжат да владеат“, изјави Филипче.
Тој додаде дека, според него, граѓаните повеќе нема да бидат подложни на, како што ги нарече, националистички и коруптивни наративи.
„Убеден сум дека на следните избори ВМРО-ДПМНЕ нема да може повторно да ги доведе во заблуда граѓаните, ниту да ги прикаже национализмот и корупцијата како патриотизам. Тоа веќе не поминува, граѓаните јасно гледаат што се случува“, рече Филипче.
