Претседателот на СДСМ, д-р Венко Филипче, на денешниот 32 програмски Конгрес на партијата „Твоја држава – твоја шанса“, посочи дека дека е особено опасно кога слабостите, неуспесите и неспособноста власта ги прикрива со националистичка реторика, наместо со реални резултати и визија за државата. Филипче порача дека возовите во политиката не се фаќаат со оправдувања, туку со одлуки.
„Особено е опасно кога таа слабост се прикрива со националистичка реторика. Зашто најлесно е неуспехот да се покрие со врева. Најлесно е тешката реалност да се оттурне со наметнато чувство дека секоја критика е предавство, дека секој разумен предлог е слабост, дека секој повик за храбрa одлука е понижување. Но, држава не се води со инает. Држава се води со визија. Држава не се брани со изговори. Држава се брани со резултати“, рече Филипче.
Во обраќањето, Филипче посочи дека по Самитот ЕУ–Западен Балкан, актуелниот момент е исклучително важен за иднината на државата и нагласи дека од Европа доаѓаат јасни пораки за перспективата на регионот.
„Во Тиват, Европа не испрати куртоазна порака. Испрати силен политички сигнал. Лидерите на ЕУ повторија дека Западен Балкан е дел од иднината на Унијата, дека проширувањето е геополитички приоритет и дека постои подготвеност процесот да стане подинамичен, попрактичен и повидлив за граѓаните. Додека ние стоиме во место, Албанија веќе ги отвори сите кластери, а договорот за членство на Црна Гора веќе се пишува во Брисел“, рече Филипче.
Притоа, Филипче потенцираше дека државата не смее повторно да остане настрана додека целиот регион оди напред.
„Што значи ова за Македонија? Значи дека историјата не нè чека. Значи дека околу нас тргнаa процеси што можат да ја променат политичката карта на Европа, а ние не смееме повторно да останеме европска провинција, да стоиме на станицата, со објаснување дека возот бил неисправен. Возовите во политиката не се фаќаат со оправдувања. Се фаќаат со одлуки“, порача претседателот на СДСМ Филипче.
Во обраќањето Филипче посочи дека најголемата слабост на власта е тоа што сака да ја претстави Европа како политичка сцена, но не и како обврска која бара одговорни одлуки и искрен однос кон граѓаните.
„И тука е најголемата слабост на оваа власт. Таа сака Европа како сцена, но не и Европа како обврска. Сака да седи на маса со Макрон и Мерц, но не сака дома да ја каже вистината за чекорот што мора да се направи. Односно да измислува и да ги плаши граѓаните со наводно губење на идентитетот и јазикот. Сака да зборува дека проширувањето е живо, а одбива да се соочи со единствениот услов што и самата Европа јасно го повторува. Тоа не е стратегија. Тоа е политичко купување време на сметка на државната иднина. И токму затоа денес СДСМ мора да биде погласен, појасен и поодговорен и појасен од кога било“, рече Филипче.
