Претседателот на СДСМ, Венко Филипче, на денешната прес-конференција оцени дека по речиси две години од формирањето на Владата предводена од ВМРО-ДПМНЕ, граѓаните се соочуваат со влошен животен стандард, растечки трошоци и зголемени државни долгови.
На денешната прес-конференција, Филипче изјави дека ветувањата дадени пред изборите останале во голема мера неисполнети, а последиците од тоа, според него, секојдневно ги чувствуваат граѓаните.
„Од ветеното пред граѓаните пред речиси две години не е реализирано ниту 20 проценти. Луѓето тоа го чувствуваат преку секојдневниот живот, преку празните паричници и сѐ потешкото справување со трошоците“, рече Филипче.
Тој посочи дека во изминатиот период единствено што бележи раст се задолжувањата на државата, додека животниот стандард опаѓа, а сиромаштијата и иселувањето, особено кај младите, остануваат сериозен проблем.
Според лидерот на СДСМ, Владата не презела доволно мерки за да го спречи растот на цените по поскапувањето на енергенсите и горивата, што дополнително го оптоварува семејниот буџет на граѓаните.
„Цените во маркетите постојано растат, а граѓаните сѐ потешко ги покриваат основните трошоци. Предупредувавме дека доколку започне бран на поскапувања, цените нема лесно да се вратат на претходното ниво“, изјави Филипче.
Тој додаде дека растот на платите не го следи темпото на инфлацијата и зголемените трошоци за живот, при што потрошувачката кошничка достигнува ниво кое за многу семејства станува сѐ потешко достижно.
Филипче посочи и на доцнењето на исплатата на плати во одредени јавни институции, оценувајќи дека економските политики на Владата не даваат резултати какви што биле најавувани.
Според него, на граѓаните им се потребни конкретни мерки за подобрување на животниот стандард, намалување на трошоците и стабилизирање на економската состојба.
