Филипче: Зошто Центарот за јавно здравје не ја испитувало водата во Гостивар секој ден?

Претседателот на СДСМ, Венко Филипче, на денешната прес-конференција од Гостивар побара одговори од надлежните институции зошто, според него, Центарот за јавно здравје не вршел секојдневни анализи на водата за пиење и зошто навреме не биле преземени мерки по појавата на зголемен број пациенти.

— реклама —

Филипче оцени дека станува збор за прашања поврзани со заштитата на јавното здравје и побара да се утврди како институциите постапувале во текот на изминатиот период.

„Зошто Центарот за јавно здравје не ја испитувал водата секој ден? Зошто по појавата на наплив на пациенти не била направена детална епидемиолошка анализа за да се утврди причината и зошто здравствените власти не реагирале навреме?“, изјави Филипче.

— реклама —

Тој постави прашања и за тоа како се обезбедува безбедноста на граѓаните во моментот, особено во угостителските објекти и на настани каде што се подготвува и послужува храна.

— реклама —

Според Филипче, институциите треба да објаснат што подразбира препораката за користење техничка вода, од каде се обезбедува и кој гарантира дека таа е соодветна за намената за која се користи.

Тој предупреди дека секое неодговорно постапување може да доведе до нови здравствени ризици и побара Министерството за здравство и другите надлежни институции јавно да ги објават резултатите од сите анализи и контроли на водата.

— реклама —

„Граѓаните имаат право да знаат. Фактите, анализите и резултатите треба да бидат јавно достапни, бидејќи навремената информација е дел од заштитата на јавното здравје“, изјави Филипче.