Филипче бара СДСМ да дојде на власт и вети: Секој граѓанин акционер во Државна лотарија

Сите граѓани да добијат акции во државните компании што успешно работат, меѓу кои и Државната лотарија, предвидува новиот „мастер план“ на СДСМ, кој го најави партискиот претседател Венко Филипче во гостување на телевизијата Алсат. Според него, со оваа мерка партијата сака да ја исправи неправдата направена за време на приватизацијата.

Филипче најави дека програмата ќе биде детално претставена во јавноста пред следните парламентарни избори, без оглед дали тие ќе бидат редовни или предвремени. Покрај распределбата на акции, планот опфаќа прогресивно оданочување, финансиска поддршка за различни категории граѓани, борба против корупцијата и проверка на поранешните функционери.

— реклама —

„Конечно, сите граѓани акционери на државните компании кои добро работат“, изјави Филипче, издвојувајќи ја Државната лотарија како еден од примерите.

„Лотарија на Македонија е една од нив. Сите граѓани ќе добијат акции. Се исправува неправдата од времето на приватизацијата“, рече претседателот на СДСМ.

— реклама —

Тој не прецизираше колкав процент од сопственоста на државните компании би им бил распределен на граѓаните, според кои критериуми би се доделувале акциите и дали тие би можеле слободно да се продаваат или да носат дивиденда.

Како друга значајна мерка, Филипче го најави враќањето на прогресивниот данок, со образложение дека е потребна поправедна распределба на капиталот.

„Огромно мнозинство од генерацијата Z во Америка, 60–70 проценти, смета дека треба да има прогресивен данок. Оттука и нашата политика во рамките на мастер планот да воведеме прогресивен данок“, изјави Филипче.

— реклама —

Тој зборуваше и за влијанието на најбогатите врз креирањето на политиките, улогата на синдикатите и идеите за поголемо учество на работниците во управувањето со компаниите.

Во делот на антикорупциските политики, СДСМ најавува соработка со Европското обвинителство и ветинг на сите поранешни функционери. Предвиден е и пакет финансиска помош за граѓаните, за кој Филипче тврди дека ќе бидат наведени конкретните извори на финансирање.

„Сакам да знаат граѓаните што точно ќе предложиме во пресрет на следните парламентарни избори, кога и да бидат тие“, рече Филипче, додавајќи дека европската интеграција останува еден од главните приоритети на програмата.

Претседателот на СДСМ најави дека партијата во следниот период ќе ги претстави деталите за предложените мерки, со кои ќе бара поддршка на следните парламентарни избори.