„Филипче и талогот на СДС против дата-центрите, дури и кога нивни сопартијци ја препознаваат нивната корист“, велат од ВМРО-ДПМНЕ

ВМРО-ДПМНЕ преку соопштение го обвини претседателот на СДСМ, Венко Филипче, дека се спротивставува на развојот на центрите за податоци и дека, според партијата, создава неоправдана загриженост кај граѓаните околу нивното функционирање.

Од ВМРО-ДПМНЕ велат дека развојот на оваа индустрија може да донесе нови инвестиции, отворање работни места и развој на нови економски дејности.

— реклама —

„Веќе е јасно дека за сè што е во интерес на граѓаните и за секој проект што носи развој и инвестиции, талогот на СДС предводен од Венко Филипче е против“, наведуваат од владејачката партија.

Во однос на потрошувачката на електрична енергија и водата потребна за ладење на центрите за податоци, од ВМРО-ДПМНЕ посочуваат дека, според досегашните објаснувања, електричната енергија ќе се набавува на пазарот или од обновливи извори, додека за ладењето постојат различни технички решенија.

— реклама —

Од партијата сметаат дека поради тоа, како што наведуваат, тврдењата за опасност за водните ресурси не ја прикажуваат целосно состојбата.

ВМРО-ДПМНЕ во соопштението го посочува и поранешниот премиер и актуелен пратеник од СДСМ, Димитар Ковачевски, кој јавно изјавил дека не го дели ставот на Филипче за ова прашање.

— реклама —

„Значи, Филипче не само што е против проектите на Владата, туку е против секој, па дури и сопартијци кои препознаваат дека развојот на оваа индустрија може да биде од корист за државата“, велат од ВМРО-ДПМНЕ.

Од партијата додаваат дека Филипче говори за цената на електричната енергија и користењето на водата, но дека за овие прашања веќе биле дадени конкретни објаснувања.

— реклама —

Според ВМРО-ДПМНЕ, наместо политичко спротивставување, потребна е политика што ќе ги поддржува инвестициите, развојот на нови индустрии и отворањето работни места.

„Граѓаните заслужуваат политика што ќе поддржува инвестиции, нови индустрии и економски развој, а не политика на постојано кочење од страна на опозицијата и политички спинови“, стои во партиското соопштение.