Лидерот на СДСМ, Венко Филипче, вели дека неговата партија е подготвена за избори, но дека прашањето не треба да се сведува на тоа дали некој некого ќе „предизвика“, туку на тоа што власта остварила од програмата со која настапила пред граѓаните.
Филипче тврди дека власта реализирала само пет проценти од ветеното, а сега, наместо да даде отчет за сработеното, бара „предизвик“ за нови избори.
„Не е работата на избори, дали некој некого ќе предизвика. Во парламентарна демократија се работи по програма на Владата. Што сè не изнаредија пред избори, а ништо не остварија. Само пет проценти. И сега бараат предизвик за избори“, рече Филипче.
Тој се осврна и на односите на власта со ДУИ, посочувајќи дека СДСМ за тоа предупредувал подолго време.
„За соработката со ДУИ ние одамна укажавме“, рече Филипче.
Лидерот на СДСМ повторно изнесе и обвинување поврзано со трошењето пари за прославата на независноста, тврдејќи дека неговата партија уште пред неколку месеци предупредувала дека се подготвува проневера.
„Ние уште пред неколку месеци кажавме дека спремаат проневера на пари преку прославата за независноста“, изјави Филипче.
За ова тврдење Филипче во изјавата не понуди дополнителни детали или докази.
Тој порача дека СДСМ е подготвен за евентуално ново изборно соочување.
„Ние сме спремни за изборите кога и да бидат, а сè излегува на виделина“, рече Филипче.
