Филипче: Повеќе пари без тендер, помалку контрола - СДСМ против измените на Законот за јавни набавки

СДСМ се противи на предложените измени на Законот за јавни набавки, за кои партискиот претседател Венко Филипче тврди дека ќе ја намалат контролата врз трошењето на јавните пари и ќе отворат простор за сомнителни договори без тендери.

— реклама —

На денешната прес-конференција, Филипче посочи дека со измените се предлага зголемување на прагот за набавки без тендер – од 5.000 на 10.000 евра за градежни работи и од 1.000 на 2.000 евра за стоки. Според него, тоа ќе им овозможи на функционерите да трошат поголеми суми без соодветна контрола и отчетност.

Тој предупреди и на укинување на обврската за добивање согласност од Бирото за јавни набавки при постапките со преговарање без објавување оглас, оценувајќи дека со тоа се зголемува можноста за склучување договори во четири очи.

— реклама —

Како спорна ја посочи и најавената промена на надоместоците за поднесување жалби, кои, според него, би се зголемиле од досегашните 5 до 200 евра на 150 до 600 евра. Филипче смета дека ова особено ќе ги погоди помалите компании и ќе ги обесхрабри да пријавуваат неправилности.

— реклама —

Тој реагираше и на предлогот за наплата на пристапот до податоците од јавните набавки, кој досега бил бесплатен и достапен за новинарите, граѓанските организации и граѓаните.

Поради овие забелешки, СДСМ поднесе 2.000 амандмани со цел да го блокира усвојувањето на законските измени. Филипче обвини дека власта се обидува да го избегне блокирањето со повлекување само на одредбите што се однесуваат на мандатите на членовите на комисиите, за кои претходно реагирала и претседателката Гордана Сиљановска-Давкова.

— реклама —

Според Филипче, ваквиот потег е обид да се отстрани дел од спорните одредби, а да се овозможи усвојување на останатите измени против кои се поднесени амандманите.