Филипче со иронија за Славјанка Петровска: „Знам дека има принципи, а ако не ѝ одговараат – има други, резервни“

Лидерот на СДСМ, Венко Филипче, со иронична порака одговори на прашањето каков ќе биде статусот на Славјанка Петровска во партијата и пратеничката група, откако таа стана дел од платформата „Разговори за иднината во 12:05“.

— реклама —

Филипче рече дека Петровска треба самата да одлучи според своите принципи, а потоа упати забелешка по која следуваше аплауз од присутните во штабот.

„Таа има нејзини принципи, нека одлучи по нив. Јас добро знам дека Славјанка Петровска има принципи, а ако не одговараат, има други, резервни“, рече Филипче, по што присутните му аплаудираа.

— реклама —

Прашан дали е подготвен да разговара со Петровска и со останатите поранешни функционери кои се дел од платформата, Филипче рече дека е отворен за разговор со секој што, според него, има добра намера.

— реклама —

Истовремено, повторно ги обвини членовите на платформата дека дејствуваат во интерес на премиерот и лидер на ВМРО-ДПМНЕ, Христијан Мицкоски.

„Јас сум спремен да разговарам со сите кои имаат добра намера. Тие се сателити на Мицкоски, кои седнале на едно место кога ги отвораме најголемите скандали на Владата, излегуваат и нѐ дефокусираат. Никој не е наивен, нема да им помине“, рече Филипче.

Изјавата следуваше по прашањето за идниот статус на Петровска, која останува дел од пратеничката група на СДСМ, а истовремено учествува во платформата на поранешни и актуелни партиски функционери „Разговори за иднината во 12:05“.