Филипче со лозарите: СДСМ ќе предложи 5 денари повисока цена за секој килограм грозје

Претседателот на СДСМ, Венко Филипче, при денешната посета на тиквешкиот регион најави дека партијата ќе поднесе законско решение со кое откупната цена на винското и трпезното грозје би се зголемила за 5 денари по килограм.

Филипче, по средбите со земјоделци и лозари во екот на бербата, оцени дека тие и годинава се соочуваат со ниски откупни цени и значително повисоки производствени трошоци.

— реклама —

„За жал, како и минатата година, истите проблеми, истиот суров и нечовечен однос од страна на премиерот Христијан Мицкоски и целата Влада, од министерот за земјоделство кон лозарите, поради тоа што нудат понижувачки откупни цени на грозјето“, рече Филипче.

Тој посочи дека во меѓувреме се зголемиле трошоците за гориво, вода, ѓубрива и работна рака, наведувајќи дека за бербата работниците бараат и по 2.000 денари дневно.

— реклама —

Според Филипче, токму затоа е потребна итна интервенција во откупните цени.

„Ќе дадеме предлог-закон во Собранието со кој откупната цена на сите сорти на винско и трпезно грозје ќе се зголеми за 5 денари по килограм“, најави лидерот на СДСМ.

Дополнително, СДСМ бара да се укине попустот од 8 проценти кој, според Филипче, дел од винарите го поставуваат како услов за веднаш да ја исплатат целата откупена количина.

— реклама —

Тој побара и интервентна мерка за црното грозје за кое, како што рече, има најави дека нема целосно да биде откупено.

„Црното грозје коешто ќе им остане на лозарите да биде откупено од страна на државата“, рече Филипче.

Според него, овие мерки се минимумот што институциите треба да го обезбедат за лозарите кои, како што посочи, во текот на целата година вложуваат значителни средства за производство и работат во тешки услови.

Филипче и во оваа изјава упати остри политички критики кон Владата на Христијан Мицкоски, обвинувајќи ја за недоволна грижа кон лозарите.