Филипче: Со Мицкоски ќе останеме без нација, луѓето масовно бараат бугарски пасоши

„Со Христијан Мицкоски ќе останеме без нација“, порача претседателот на СДСМ, Венко Филипче, во интервју за телевизијата Алсат, обвинувајќи ја Владата дека со економските политики ги принудува граѓаните да бараат работа и подобар живот надвор од Македонија.

Филипче оцени дека економската состојба е катастрофална, а за дел од граѓаните и неиздржлива, посочувајќи ги ниските плати, високите животни трошоци и иселувањето како сериозни проблеми.

— реклама —

„Економијата, Христијан Мицкоски и оваа влада ја водат во бездна. Огромен број бараат работа во Европа и бараат да извадат, од економски причини, бугарски пасоши. Ние со Христијан Мицкоски ќе останеме без нација, тоа ќе се случи. Кој може да живее со ваква минимална плата?“, изјави Филипче.

Според него, граѓаните сè потешко ги покриваат основните животни потреби, додека Владата не презема доволно мерки за подобрување на нивниот стандард.

— реклама —

„Не можат да врзат крај со крај, граѓаните не можат да живеат од лошите економски политики на Христијан Мицкоски. Не можат месецот да го поминат. Празни се паричниците, празни се фрижидерите. Луѓето гладуваат“, рече претседателот на СДСМ.

Тој го обвини премиерот дека нема капацитет за управување со економијата и дека, според него, не покажува доволно разбирање за потребите на граѓаните и за управувањето со мултиетничка држава.

Филипче се осврна и на состојбите во земјоделството, тврдејќи дека Владата не ги исполнила ветувањата за сигурен откуп, повисоки откупни цени и зголемени субвенции.

— реклама —

„Зошто не им даде пари на земјоделците? Зошто не ги зголеми откупните цени? Зошто не ги зголеми субвенциите? Догодина нема да има земјоделство. Знаете дека догодина нема да има сточарство? Знаете дека нема да има лозови насади? Затоа што ќе им скапе грозјето како сега на нивите“, изјави Филипче.

Тој повторно го актуализираше предлогот на СДСМ за зголемување на минималната плата на 600 евра, наведувајќи дека парламентарното мнозинство веќе трипати го одбило.

„Ги одбиваат сите предлог-мерки за подобрување на стандардот на граѓаните. По трет пат го одбија нашиот предлог да се зголеми минималната плата на 600 евра. Повеќе од три сегашни минимални плати се потребни за едно семејство да ја наполни потрошувачката кошничка“, рече Филипче.

Претседателот на СДСМ оцени дека без повисоки примања и поголема поддршка за граѓаните и земјоделците, економските проблеми дополнително ќе го поттикнуваат заминувањето од државата.