Филипче за 25 години од Охридскиот договор: Соживот, а не поделби и омраза

По повод 25-годишнината од потпишувањето на Охридскиот рамковен договор, претседателот на СДСМ, Венко Филипче, порача дека договорот претставува темел на мирот, соживотот и демократската иднина на Македонија.

— реклама —

Филипче посочи дека државата е заеднички дом на сите граѓани и дека различностите треба да претставуваат сила на општеството, а не причина за политички поделби.

„Охридскиот рамковен договор е потсетник дека мирот, дијалогот и компромисот се секогаш посилни од конфликтот, поделбите и омразата“, порача Филипче.

— реклама —

Тој оцени дека денес, наместо да се негуваат вредностите на мирот, дијалогот и меѓусебното почитување, власта предводена од Мицкоски, како што наведе, повторно создава поделби и атмосфера на страв и омраза.

— реклама —

Филипче ја обвини ВМРО-ДПМНЕ дека ги дели граѓаните, создава непријатели и шири страв, при што се осврна и на употребата на изразот „талог“ за дел од граѓаните.

„Македонија заслужува да биде просперитетна, интегрирана држава – дел од Европа, каде секој граѓанин ќе се чувствува сигурен во сопствената земја. Не со поделби. Не со омраза. Не со етикети како „талог“. Со вистина, со правда и со достоинство“, порача претседателот на СДСМ.

— реклама —

Тој додаде дека по 25 години од потпишувањето на договорот, обврска на сите е иднината на државата да се гради врз соживот, еднаквост и меѓусебно почитување.