Филипче зборуваше за раст на рејтингот, а во Брвеница изгуби со четири спрема еден, вели Манасиевски

ВМРО-ДПМНЕ го повика претседателот на СДСМ, Венко Филипче, јавно да ги објави анкетите за партиските рејтинзи за кои, според владејачката партија, најавил дека ќе ги презентира пред две недели. Од ВМРО-ДПМНЕ прашуваат зошто резултатите сè уште не се објавени и дали воопшто постојат истражувањата на кои се повикал Филипче.

Портпаролот на ВМРО-ДПМНЕ, Валентин Манасиевски, на денешната прес-конференција изјави дека Филипче, пред предвремените локални избори во Брвеница, најавил анкети кои покажувале зголемена поддршка за СДСМ и незадоволство од ВМРО-ДПМНЕ.

— реклама —

„Две недели по таа изјава на Филипче, ниту трага ни глас од анкетите. Каде се тие негови анкети во кои СДС има голем пораст во рејтингот, а ВМРО-ДПМНЕ пад? Зошто не ги покаже во јавноста? Зошто ги крие? Дали тие анкети се направени во штабот на СДС?“, праша Манасиевски.

Тој се осврна и на изборниот резултат во Брвеница, тврдејќи дека ВМРО-ДПМНЕ остварила четирикратно поголема поддршка од СДСМ.

— реклама —

Според Манасиевски, изборниот резултат е спротивен на тврдењата за раст на рејтингот на опозициската партија. Тој упати критики и за позицијата на Филипче во СДСМ, наведувајќи дека сè почесто се соочува со барања за оставка.

„Поддршката на Филипче во СДС е на завидно ниво, кој стигне му бара оставка, но ние како ВМРО-ДПМНЕ му даваме целосна поддршка“, рече Манасиевски, иронизирајќи со состојбите во опозициската партија.

— реклама —

Портпаролот на ВМРО-ДПМНЕ изнесе и тврдења за разликата во поддршката меѓу партиските лидери, наведувајќи дека премиерот Христијан Мицкоски има предност од седум спрема еден во однос на Филипче, а ВМРО-ДПМНЕ пред СДСМ од четири спрема еден.

За овие бројки на прес-конференцијата не се наведени конкретна агенција, период на спроведување или методологија на истражување.

Манасиевски оцени дека СДСМ ја губи политичката поддршка и тврди дека Филипче не сака предвремени избори поради можниот изборен резултат.

Од ВМРО-ДПМНЕ повторно побараа Филипче да ги објави најавените анкети, со цел јавноста да има увид во резултатите на кои се повикува.