Финансиската полиција ќе ги истражува наодите на Државната ревизија за неправилности во работата на Македонската радио телевизија. До архивата на Полицијата е доставен конечниот Ревизорски извештај за 2017 година.
„Управата за финансиска полиција ќе постапи по истиот и согласно добиените наоди ќе биде известено и надлежното јавно обвинителство“, велат оттаму.
По допрен глас, предмет за несовесното работење на јавниот сервис ќе отвори и Антикорупциската комисија, која се уште ги анализира наодите на државниот ревизор. Иако денеска стапивме во контакт со директорот на МРТВ, Марјан Цветковски и најави одговор на прашањата поврзани со пропустите во телевизијата, сепак одлучи да не даде свој став во врска со сомнежите за несовесно работење. Кусо, телефонски побара прашањата за кои сме заинтересирани да му ги испратиме по СМС порака.
„Дали ќе може ваш став за ревизорскиот извештај за 2017 – та година и наодите во него. Може ли да снимиме куса изјава, сепак се дигна прашина околу извештајот“, гласела СМС пораката испратена од Алсат-М до Марјан Цветковски, директор на МРТВ
Цветковски ја прими пораката и веќе не одговори на телефонските повици. Инаку, ревизијата во МРТВ за 2017 – та година откри низа пропусти. Токму директорот Цветковски овластил раководител на сектор да потпишува документи во негово име. Полномошното за ова било генерално, без да се прецизираат овластувањата, а документот не бил ниту архивиран. Поради ова, ревизијата се сомнева дека постои ризик од незаконско работење.
Дополнително, иако ненадлежни, Програмскиот совет и Надзорниот одбор дале амин МРТВ да се задолжи со заем во банка. Нарачале да се направи и бизнис план. Барале над два милиони евра. Бизнис планот бил покритие. Парите ги земале и наместо за инвестиции, телевизијата почнала со парите да се раздолжува. Ревизорите откриле дека јавниот сервис за документарци потрошил над 2,2 милиони евра. За серијал се трошеле од 100 до 400 илјади евра.
