Фолксваген ќе укине 50.000 работни места, платите на работниците достигнуваат 7.700 евра

Германскиот автомобилски гигант „Фолксваген“ се соочува со сериозна деловна криза, а раководството планира да укине дополнителни 50.000 работни места, од кои половината во Германија. Компанијата до 2030 година предвидува вкупно намалување на 100.000 работни места, додека претседателот на управата, Оливер Блуме, планира заштеди од повеќе од пет милијарди евра само на трошоците за вработените.

И покрај планираните кратења и замрзнувањето на вообичаените зголемувања на платите, вработените во „Фолксваген“ и натаму заработуваат значително повеќе од германскиот просек.

— реклама —

Според податоците на работничкиот совет, основната бруто-плата на повеќето работници во производството се движи од 3.900 до 4.300 евра месечно. Со редовните додатоци и преостанатите бонуси, просечните месечни бруто-примања на работниците во производството изнесуваат околу 4.500 евра. На висината на заработката влијаат и додатоците за ноќна и неделна работа.

Основните плати на помошните работници, на пример, оние што работат во фабричките кујни, изнесуваат околу 2.400 евра месечно. Вработените во обезбедувањето на влезовите заработуваат околу 3.500 евра.

— реклама —

Мајсторите и раководителите во производството, кои одговараат за тимови и производствени линии со вредност од милиони евра, имаат месечни примања од најмалку 5.950 евра.

Почетната плата за вработените со завршени основни академски студии изнесува околу 5.300 евра, додека за оние со магистерски студии почнува од 5.600 евра месечно. Искусните инженери и програмери можат да заработуваат до 7.700 евра, а одредени специјалисти, како фабричките лекари, имаат примања повисоки од 8.000 до 9.000 евра месечно.

Годишните бонуси, сепак, се намалуваат. Додека вработените за 2024 година добиле речиси 4.800 евра по тој основ, во 2026 година вкупниот износ ќе биде помал за речиси 1.700 евра. Во моментов е гарантиран минимален бонус од околу 1.900 евра, кој треба да биде исплатен во ноември.

— реклама —

Стандардната работна недела во „Фолксваген“ трае 35 часа, а вработените имаат право на 30 дена годишен одмор. Тие можат и додатокот во висина од 27,5 отсто од месечната плата да го заменат за уште шест слободни работни дена, со што бројот на неработни денови може да достигне 36 годишно.

За споредба, просечната бруто-годишна заработка во Германија, во сите стопански дејности, изнесува околу 54.100 евра, при подолго работно време и помалку слободни денови.

Синдикатот ИГ Метал и работничкиот совет ги отфрлаат тврдењата на раководството дека платите се главната причина за проблемите на компанијата. Според нивните пресметки, дури и преполовувањето на платите би ги намалило производствените трошоци за автомобили за само околу пет отсто. Синдикатот смета дека клучните проблеми се поврзани со иновациите, конкурентноста на моделите и брзината на вложувањата.

По две и пол години без зголемување на основните плати, синдикатот за претстојните преговори бара зголемување од пет отсто. Тоа најавува нова рунда напнати преговори меѓу вработените и раководството на компанијата во седиштето во Волфсбург.