Фон дер Лајен остро реагираше на погребот на Младиќ: „Ова е неуспех во соочувањето со мрачното минато“

Претседателката на Европската комисија, Урсула фон дер Лајен, изјави дека снимките од погребот на Ратко Младиќ во Белград биле „шокантни“, а дека официјалните елементи на поддршка и присуството на некои високи српски функционери на погребот се „длабоко жалосни“.

Таа на социјалната мрежа Икс напиша дека тоа покажува неуспех во соочувањето со „мрачното поглавје од поновата европска историја“ и дека е спротивно на вредностите врз кои се заснова патот на Србија кон Европската Унија.

— реклама —

„Ратко Младиќ беше осуден воен злосторник. Тој беше одговорен за геноцид, воени злосторства и злосторства против човештвото. Почина додека ја издржуваше доживотната казна за геноцидот во Сребреница и други злосторства. Нашите мисли се со сите жртви на злосторствата извршени во земјите од поранешна Југославија“, напиша фон дер Лајен.

— реклама —

Генералот Ратко Младиќ во јуни 2022 година правосилно беше осуден на доживотна затворска казна поради, според обвинението, воени злосторства и геноцид во Сребреница.

— реклама —

Тој почина во притворската болница во Хаг на 27 август, откако Механизмот во Хаг повеќепати ги одби барањата да биде пуштен на лекување во Србија.

Посмртните останки на Младиќ беа пренесени на 3 септември со авион на Владата на Србија од Хаг во Белград и пренесени во Военомедицинската академија, откако семејството побара обдукција.

Тој во понеделникот беше погребан на Топчидерските гробишта во Белград со воени почести. На погребот присуствуваа голем број граѓани, како и повеќе функционери на Србија и Република Српска, а опело служеше српскиот патријарх Порфириј.