По неколкунеделни шпекулации, конечно е откриено која модна куќа стои зад венчаницата на пејачката Дуа Липа. За својот свадбен ден таа избрала ексклузивна креација на „Шанел“, дизајнирана од Матије Блази.
Станува збор за првата венчаница од високата мода на „Шанел“ што Блази ја создал за долгогодишна пријателка на модната куќа.
Креацијата била рачно изработена во париските ателјеа на „Шанел“ и претставува резултат на соработка меѓу неколку специјализирани уметнички работилници на брендот.
Венчаницата била украсена со 480.000 рачно везени перли, додека за изработката на декоративните детали биле потребни повеќе од 1.100 часа работа. Долгиот шлеп бил дополнет со 25.000 пердуви, а стајлингот го заокружувал шестметарски вел од тул, украсен со перли, пердуви и рачно изработени апликации.
Пејачката носела и специјално изработени бели сатенски чевли, создадени по нарачка.
Од „Шанел“ соопштија дека им претставувало чест што токму тие ја облекле Дуа Липа за еден од најважните денови во нејзиниот живот.
Пејачката со години соработува со француската модна куќа и редовно се појавува во нивни креации на јавни настани и модни ревии.
Дуа Липа и нејзиниот сопруг, актерот Калум Тарнер, првпат го кажале судбоносното „да“ на 31 мај во Лондон, на интимна церемонија во градското собрание Олд Мерилебон. Една седмица подоцна организирале поголема прослава на Сицилија во присуство на семејството и пријателите.
Токму главната свадбена креација, која сè досега беше чувана во тајност, привлече големо внимание во светската јавност.
