Македонскиот филм продолжува да бележи значајни успеси на меѓународната сцена, а ново признание стигна од Сараево, каде што на 32. издание на Сараевскиот филмски фестивал два македонски филма освоија вкупно пет награди.
Најголем успех постигна филмот „17“ во режија на Косара Митиќ, кој доби четири признанија. Меѓу нив е Специјалната награда за промовирање на родовата еднаквост, како и „Срцето на Сараево“ за најдобра актерка, кое ѝ припадна на Ева Костиќ.
Филмот ги освои и наградата на „Синеуропа“ и наградата од публиката на „УниКредит“.
Уште едно признание за македонската кинематографија донесе филмот „Скејтбордингот не е за девојчиња“ на режисерката Дина Дума, кој ја освои Специјалната награда „Младински перспективи“.
Од Агенцијата за филм оценуваат дека петте признанија се потврда за квалитетот, авторската сила и меѓународниот потенцијал на современата македонска кинематографија. Оттаму го нагласуваат и значењето на континуираната поддршка за развојот и поголемата меѓународна видливост на македонскиот филм.
