Силно невреме, проследено со силен ветер, обилни врнежи од дожд и локално со град, ги зафати Смедерево и неговата околина нешто пред полноќ, предизвикувајќи материјална штета на повеќе локации.
Невремето, кое траело повеќе од 20 минути, соборило дрвја и скршило бројни гранки, при што биле оштетени и неколку возила.
Екипите на Јавното комунално претпријатие „Зеленило и гробишта“ уште во текот на ноќта излегле на терен и започнале со расчистување на последиците. Според нивните информации, досега биле извршени повеќе од 30 интервенции, а активностите продолжуваат согласно со приоритетите, пренесуваат српските медиуми.
Последици од невремето има и во Општина Смедеревска Паланка, каде што удари од гром предизвикале дефекти на електроенергетската мрежа. Поради испад на главниот трансформатор, дел од потрошувачите останале без електрична енергија.
Дополнително, во фабриката за преработка на вода изгорел трансформатор, поради што градот привремено останал и без водоснабдување.
Екипите на електродистрибуцијата и комуналните служби од рано утринава работат на отстранување на дефектите. Според локалните власти, најпогодени се населбата Церовац и уште неколку делови од општината.
Надлежните очекуваат проблемите со снабдувањето со електрична енергија и вода да бидат целосно отстранети во текот на денот.
