„Оваа година навршуваат 10 години како што отпочнавме со реализирање на активностите под името Вистински дела на љубезност. Секојдневно среќавајки се со предизвиците на дел од нашите сограѓани и трудејки се да помогнеме секаде каде што е потребно согласно нашите можности. Радоста и исполнетоста од таквиот ангажман ни дава дополнителна мотивација да продолжиме со спроведување на нашата мисија“, пишува Вистински дела на љубезност.
Тие додаваат:
„Уште поголема е сатисфакцијата кога на терен ќе видиме граѓани кои самоиницијативно се даваат себеси во помагање на другите, одвојувајќи од своето драгоцено време, без калкулации и без размислување. Таков беше примерот и со еден наш сограѓанин кој застана на левата лента од булеварот со цел да ѝ помогне на една повозрасна жена која ја повредила ногата и која седи беспомошна на бетонот на екстремно топлото време. Со помош на нашиот волонтер, кој случајно се затекна на таа локација, ја ставија во неговиот автомобил и ја однесе до нејзиниот дом. Ова е емпатија на дело, нешто што треба да биде дел од секој од нас. Големо БРАВО и голема благодарност до нашиот анонимен сограѓанин“.
