Неексплодирана артилериска граната од Првата светска војна е пронајдена кај битолското село Меџитлија, во близина на македонско-грчката граница.
Од Дирекцијата за заштита и спасување информираат дека пиротехничарот Ѓорѓи Стефанов безбедно ја отстранил гранатата со калибар од 75 милиметри и ја транспортирал до Армискиот полигон „Криволак“, каде што ќе биде уништена.
Гранатата била откриена за време на градежни работи што ги изведувало Јавното претпријатие „Стрежево“ – Битола, во атарот на селото Меџитлија.
Пријавата до Дирекцијата за заштита и спасување била доставена преку единствениот број за итни случаи 112.
