Сечењето автомобилски гуми со нож или дупење со шило е новата појава на вандализам, која веќе втора недела се случува во близината на Министерството за економија, на улицата Јуриј Гагарин. Веќе неколку автомобили досега завршија кој со по една кој, пак, дури и со три дупнати гуми.
Некои од оштетените случајот го пријавиле и во полиција, иако се сомневаат дека сторителите ќе бидат најдени и најстрого казнети. Пријава за случувањето стигна и до редакцијата на skopjeinfo.mk од вработен во околните фирми.
Како што пишува порталот тој се пожалил дека некој му ги дупнал гумите на неговиот автомобили во близината на тукашната филијала на Комерцијална банка.
Кој им е мотивот на оштетувачите и за него и за нас остана прашање без одговор. Станарите од околните згради не сакаат многу да коментираат за случувањата, иако некои многу воздржано и кратко претпоставуваат дека можеби е за паркинг-простор. Дали вакви или слични случувања има и во други делови во градов, не добивме одговор од Министерството за внатрешни работи, од каде што, пак, беа децидни дека од почетоков на годинава досега на реонот од улицата Јуриј Гагарин во населбата Капиштец била евидентирана само една пријава за оштетен ретровизор од возило.
