„Фронтот за вистина и правда е повик за надпартиско обединување за иднината на државата“, вели Кузеска

Фронтот за вистина и правда претставува повик за надпартиско обединување околу иднината на државата, порача денеска портпаролката и членка на Извршниот одбор на СДСМ, Богданка Кузеска.

— реклама —

На прес-конференција, Кузеска истакна дека наместо поделби, СДСМ нуди визија за обединување околу државните интереси, економскиот развој, борбата против корупцијата и европските вредности преку поширок Фронт за вистина и правда.

Таа нагласи дека Македонија не смее да биде заложник на политики што ја оддалечуваат од европскиот пат и дека е потребно заедничко дејствување околу клучните државни интереси.

— реклама —

„Фронтот за вистина и правда не е партиски проект, туку широко надпартиско општествено движење отворено за сите граѓани, организации, интелектуалци, професионалци, синдикати и општествени чинители“, изјави Кузеска.

— реклама —

Воедно, таа посочи дека со „Скопската иницијатива“ и платформата „Твоја држава, твоја шанса“, СДСМ започнува нова етапа на политичко дејствување.

„Етапа заснована на вредностите на социјалдемократијата, борбата за подобар животен стандард, борбата против корупцијата и европската иднина на Македонија. Програмската платформа „Твоја држава, твоја шанса“ е визија за модерна, праведна и европска држава во која институциите работат за граѓаните, трудот е вреднуван, а младите имаат причина да останат и да ја градат својата иднина дома“, рече Кузеска.

Таа додаде дека преку „Скопската иницијатива“ СДСМ ја потврдува својата улога како обединувачки фактор на поширокото прогресивно движење во регионот и Европа, кое се спротивставува на корупцијата, авторитарноста и антиевропските политики.